///09 d zit lauft//

toubi:
d'ziit lauft oder chrücht oder rast oder rennt
öbmä schafft oder fickt oder fiirt oder pennt
ziit isch relativ, relativ s ziitempfindä
und äs hangt vom dänkä ab wiä schnell d’zeiger witärspringät
will häsch vo däm wo drabisch
dä aschiss
isch d’bewegig vo dä ziit jo
quasi statisch
doch machsch was fanatisch
tuäsch öpis wo der gfallt
vergaht ziit ohni halt
wiä im flug zimli bald
ziit verlauft so oft im sand
wiä sich touris i dä wüästi
und wär als erstä ufstaht
isch nöd immer au dä früästi
hät mäh zvill devo
nimmt mes meistäns eher gmüätli
und chunt dänn glich in stress
wiä nach sex ohni verhüätig
chunt ziit chunt rat
doch ziit vergaht
hinderlaht ihri spurä – ihri wundä
im takt vo dä uhrä sind mir ständig a sii bundä
tick tack, tick tack...
so lauft dä chli am grossä na
wo än ständig überrundet
und sekundä um sekundä
summierät sich zu stundä
nach äm winter chunt dä früälig
chunt dä summer chunt dä herbst
blätter wachsäd wärdät grüe
und schlussendli bruun gfärbt
mit dä ziit wird mä älter
mit äm alter chömäd d’faltä
mit dä ziit wird mä chälter
drum wömmer ziit aahaltä
wönd für immer jung bliibä
dä läbänslauf umschribä
mit botox und silikon
für diä ewig jugend stumm liidä
doch werdemer chum siege
will d ziit isch unerbärmlich
und wer glich dägegä kämpft
wird für ali ziitä dumm bliibä…

s rad vo de zit trait
ohni mtleid
s isch am rad sini zit
im kampf geg de ziitgeist

soundnomad:
tick tack tick tack
bi terminmässig scho wieder so wit ab
vom plante aso mit charmantem
lächle druf reagiere
d zit di chan eim scho frustriere
wenn me de kampf wogt
well a jedem standort
het sie heimvorteil
sich degägä stelle isch es unheil-
volls unterfange
chasch nu de zug verpasse
oder der burnouts ifange
sie isch de effizientischti
seriekiller und rinnt üs dur d finger
für ewig und immer
isch de menschheit en zwinger
kan schimmer bezwingmer sie jemols
sie machts kompliziert
künftig wie ehmols
und raubt de schnuf isch für
de mensch en stete fluss
doch öb er jemols ende muss isch schwär z säge
d frog isch ebe ob das wichtig isch für mich s jetzt und do
well sie jetz scho so verdichtet isch
das schinbar jede gnueg und zwenig het
i de generation-@
zwor scho nett sone rund-um-d-uhr-gsellschaft
frog mich aber ob das d seel schafft
z verdaue hend ihr all vertraue?
was sölls d zit lauft nimms in chauf
i will de tripp jo nöd verschwende
und mich vo ihre abwende
und z letscht ziitarm verende
drum bekenn i mi zu ihre
und ihre wirre verstrickige
läb mit ihre irre entwicklige
de grosse und mickrige
tag fü tag bis zum grab

s rad vo de zit trait
ohni mtleid
s isch am rad sini zit
im kampf geg de ziitgeist