offshore
m: leming, metrik, ruedi t: metrik

1. strophe:
ig bi ender nachdänklech - säge när nid ig has klar gwüsst
und letschtändlech isches ja nid z schiksau wo mi da küsst aber ig fa afa wüsse
es bi ja ig wo entscheide
und o wenn ig z risiko iga zumene spätere zytpunkt
wieder z entgleise, ig weiss es, und glich versteisches
muess dir nüt erkläre wüu du weisches scho vorhär
treisch mini gedanke uf rose und ig cha froh si – nur wohär
wo blibt bloss die
chtigkeit wo mi treit für z läbe ha immer gmeint ig suechi vergäbe
merke dass ig wieder einisch bi drnäbe gläge
weiss dass ig nid kläglech versäge sueche haut eifach uf umwäge
aber dir chani das ja stumm säge wüu grundsätzlech
luege mir engang stundelang id ouge
und wüsses ohni z erfahre mir chöi enang vertroue
wot iz nid uf sand boue aber es isch scho ungloublech
e verbindig wo entsteit
es gfüehl macht sich breit und ig weiss doch ou nid obs mit treit
dini art isch so zart und filigran
läbesmuet aus fortbewegigsmittu für d outofahrt näme mir di smart
dr wind i dine haar ader outobahnraststette
die botschafte i dim blick - versteckschse und glich heschse mir klar gä
muess mi fescht astränge dass ig au die sache wieder cha wahrnä
bi immer wieder erstuhnt, wie du uf mi igeisch
und au die sache wo du mir mitteusch und ohni wort z säge glich seisch


refrain:
tropf für tropf verschwindet hie im süesswasser
konture löse sich i öufarb uf mit eleganz
vermischt sich und lat sich sanft la verblasse
und us dr distanz vernimme ig sinnlechi sounds

sie maut es biud imene chleid wo zeichnet
es entsteit e siluette es wird nid z dick uftreit
fantasie wärde erweckt und biuder gmale
und erinnerige lö eim la tröime fürne ehwigkeit



2. strophe:
mir dräie mitenang im kreis
luegsch mi a – lachsch mi a - ig warte bis du di häreleisch
mi mitziesch hocke zäme ufem stei
luege wie z kursschiff düregeit, füresteit und im churztrip – verbigleitet
lege vo hinger mini arme um di
es wird warm und het charme die ganzi gschicht
die farb vo däm summer zeigt sich schlicht
pastell im astrich, exotisch im gschmack und erotisch im iblick
kulisse äxtra ufgsteut für das stück
unds ufgeit, süess im buget, gniesse jedi minute
fliesse mit dir mit und versueche
dr gschmack la z entfaute - merke geng wie viu dä enthautet
das z erfahre isch unzaubar
berüersch mi wie side im wind - empfindlech
füehle mi geborge - sinnlech - nöi gebore
gspürsch mi innerlech innig vergisse mini sinne
es passiert aus i mir und dir inne lö aus la rinne
faue is wasser und blibe dinne
wärde rascher d zyt geit a üs verbi
und glich verpasse mir nüt auso chum mir lös la si
mir si zytglich glichschnäu dänke nur a di
zytrüm vor wäut die giute nid mir si z höch und z schnäu
lege üsi tröim is zäntrum steue keini frage näme tag für tag wiener chunt
gniesse dr momänt wüus schüsch zytlech id ehwigkeit nid längt
mir hei nüt verdrängt wüu dr umstang zwüsche üs scho längt
i däm umfang
was morn isch und geschter isch gsi interessiert mi nid
bewegsch di mit mir du bisch o so bi mir


refrain:
tropf für tropf verschwindet hie im süesswasser
konture löse sich i öufarb uf mit eleganz
vermischt sich und lat sich sanft la verblasse
und us dr distanz vernimme ig sinnlechi sounds

sie maut es biud imene chleid wo zeichnet
es entsteit e siluette es wird nid z dick uftreit
fantasie wärde erweckt und biuder gmale
und erinnerige lö eim la tröime fürne ehwigkeit



3. strophe:
mir lige näbenand wie im sand ig wot nieme ufstah
tagelang chum gib mir dini hand ig zeige dir aruba
luegsch mi a, längsch mi fin a gspüre dini hut da
z wasser perlt liecht über di buch ab
dr gruch vo dine haar ig bruche nüm angers die situation hie
isch unnahbar unbeschribbar
i schnide dir es stück vo dere frucht ab
mir hei tusegi vo frage trotzdäm nüt isch unklar
ig gspüre di atem
e huch vo dir aus erschte schritt es lache
unterbrichsch die stimmig mit dim blick redsch körpersprach
es brucht keis wort beförderisch üs ane ort
i mache das wa de wosch - i bi dr hörig - es isch nüt verbote
wüus eifach schön isch
bis di buch a mim chläbt ig bruche nüm bis uf das läbe
wies nüm angers gäbt
ghörsch das wasser die stiui
fa afa taschte raschte fiumrif
färnab vo laschte das spiu hie lege viu dri es wird miud wie
e summerräge üsi körper nass - e wasserfau wo entspringt hie
flüge geng wie schneuer d füechtigkeit lauwarm es wird heuer
mir si zäme da fö langsam afa schwäbe näbu bausam
flüge ar sunne entgäge aus wird mitzoge – undüdlech
gseh die insu iz vo obe
360 grad glücklech
lege wieder zur landig a bis mir wieder am strand lige wie am afang
du sanft mit dire hand über mis gsicht abfahrsch
ire wäut us badeschum – hei dräit die wäut überhoupt no
i glaubes chum


refrain: (2x)
tropf für tropf verschwindet hie im süesswasser
konture löse sich i öufarb uf mit eleganz
vermischt sich und lat sich sanft la verblasse
und us dr distanz vernimme ig sinnlechi sounds

sie maut es biud imene chleid wo zeichnet
es entsteit e siluette es wird nid z dick uftreit
fantasie wärde erweckt und biuder gmale
und erinnerige lö eim la tröime fürne ehwigkeit